29/12/2010. Area 1. Tiraña. Xabalí

Por fín volvemos a cazar a Tiraña. Ye el nuestru valle talismán. Ye muy difícil que aquí fallemos y puede ser por fín la manera de quitanos la cigüa que tenemos desde les últimes caceríes. Quedamos a eso de les 9 nel chigre de Tiraña pa estrenalu colos nuevos dueños. Lupión ya cuando llegamos está tremando con Javi el Guarda los destinos de la xente. Vamos a copar en largo, dende Xerru Vil hasta Peña Mayor, colos puestos de Fresneo, Ricao...etc etc

Asina ye que salimos de Tiraña y ca'un per un llau vamos a los nuestros destinos. Nel mio casu tócame na zona de Xerru Vil, onde tamién tan Lupión, Jose Luís padre y Fiu y Muñera. Los monteros empiecen temprano a echar el monte y a eso de les 10 avisen que hay rastros ya cerca de Ricao. Estos confirmense y sale la gochada, descolgándose un gochu hacia los puestos del Prau del Obispo en dirección a Fresneo, pela peña, onde ta Pedro apostiau. El gochu vese perfectamente y van avisando a Pedrito según-y llega, pero nun se oye disparu per nengún llau, se-y acerca, va a pasar, va a pasar... pasa, pasa y pasó!!!. Los ánimos se alteren y les emisores clamen a voces a ver que pasa, que el xabalí pasa al llau de Pedro y nun se oye un tiru...

El xabalí paez que va a escapar pal lote 2, pero arrodia Xerru Vil y los puestos de Muñera y Jose Luís fiu, que se volvieron pa la so espalda atisbenlu y a pesar de la distancia abren fueu, nun tiroteu que si buen nun lu alcancen, consiguen tornarlu a la echá. Esti arrodia de nuevo Xerru Vil y diríxese a media altura al puestu de Lupión que abre fueu a distancia, pero lu pierde de vista, y mientres el xabalí vuelve a salir al claru y dirixese de frente a él, Lupión en un intentu un poco torpe de cortalu per baxo, descuelgase pa cortalu sin ver que el xabalí taba a la so altura al otru llau del cantu, corriendo ambos en paralelo sin vese hacia abaxo, hasta que el xabalí consigue salir y baxar a tou meter hacia la riega sin que Lupión pueda facer nada. Los perros tienen el rastru y comienza una gran carrera que lu llevará pasando por el Ordaliegu hacia los navales.

Entre tanto sabemos que Fran en Ricao ya mató un gochu de los que salieron con esti primeru, si bien hay perros sueltos y nun se sabe exáctamente cuantos fueron los gochos desencamaos.

la orden ye coger los coches rápidamente y subir hacia tres picos pa cortar al xabalí.

Con los Jose Luises nel Jeep tiro pela pista que va de la Sartera a Fresneo cola intención de coger la pista que por baxo peñamayor hasta la Bauga y poder subir pa tres picos pela pista que va a La Casilla, pero pol camín, en una confusión veome nuna pista col suelu nidiu como xelu que fae que'l todoterreno escore pa la sebe atrullando la rueda de atrás nuna poza sin posibilidá de salir, dexándonos tiraos el restu la cacería a la espera de que algún llegue a sacanos.
Seguimos resignaos la cacería peles emisores, escuchamos varios disparos pero nadie confirma nada, pasa el tiempu y sabemos que los puestos están colocaos y que el xabalí sigue subiendo, asina que solo ye esperar que lu sentencien.... y finalmente ocurre. El xabalí dirixese per un linderu hacia un prau onde lu espera Adrián, pero ponse a tiru de Fran y alcánzalu sin poder paralu. Nel escape Adrián abre fueu y consigue detenelu con un tiru na espalda que lu balda.

A rematalu llega entós Fran, que con torpeza tien que pega-y varios tiros hasta conseguir abatilu definitivamente, provocando un poco estroza na tocha del gochu. Yeren les 3:30 de la tarde y acaba por fín la cacería llogrando facer el cupu por primer vez esta temporada. Finalmente Adrián acercaríase col Discovery a sacame del folleru onde me había metio, pudiendo salir todos pa Tiraña onde ficimos les pertinentes fotos y onde quedaríemos a media tarde pa comer/cenar.

Comentariu Gastronómicu:

Volvemos a dir, dempués de muncho tiempu al chigre de Tiraña, rexentau ahora per una pareja muy afayaiza. Les raciones muy buenes y abundantes. Patates cocies con pulpo, Adobu, Sopa de mariscu (un poco sosa), callos, postres, chupitos.... Decir que expectacular. Pa la cacería del Venau en Tiraña seguramente repetiremos.

11/12/2010. Area 8. Carrio Xabalí

0

8/12/2010. Area 6 Villoria. Xabalí

0

1/12/2010. A4. SOTO. Xabalí

Primer día de Diciembre. Munches semanes tuviemos que esperar hasta esti nuevu día de caza nel coto. Pela mañana al levantamos, aunque el tiempu había sio buenu los dies anteriores, el día amanecía frio y según díbemos pa Muñera la lluvia pasaba a ser aguanieve. Una vez en Muñera, al aparcar en los Panchos ya trapiaba a tou meter, cubriendo rápidamentes coches, sin paecer que fuere a parar.

Asina ye que aprovechamos el tiempu entre caldos y vinos calentaos, parties de cartes y conversaciones en su mayor parte de caza. Por desgracia ya yeren les 10 de la mañana y el monte había quedao cubierto, con poca nieve pero cubierto. Ya habíen comunicao al guarda (Revuelta) que les otres caceries habien sio suspendies, pero nosotros queriemos esperar. Siempre hay esperanza.

Al poco el guarda nos comunica que lo mejor ye firmar la cancelación y que si abocanaba ya veriemos...

Pues bien, abocanó y no solo eso, sinon que a eso de les 12:30 la nieve quítase de los praos y sale el sol, asina que nos animamos y disponémonos a comenzar la cacería. Avisamos al Guarda, pero pa nuestra sorpresa comunícanos que la cacería está suspendida y que nun se puede reanudar ?¿?¿ (Habiemos entendio que si se quitaba la nieve se retomaba sin mayor problema...).

Munchos nun acepten esto y ante la impotencia deciden dir a ver al presidente, pa que intereceda a la vista de que les condiciones habíen cambiao y la nieve nun taba cubriendo todo el lote y permitiere la cacería, pero esti, lejos de interceder, ofiéndese enteru y nun quier saber nada, con males formes métese en casa y desentiéndese de todo. Supongo que él nun sentirá como nosotros lo que ye el haber pagao la cacería, la comida de esi día, los monteros, el tener que madrugar, el andar colos perros palantre y patrás.... pa llueu nun poder cazar. Vamos, o ye eso eso o nun tenía el día, si non igual yera un poco más receptivu, nun ya pa dexar cazar o no, sinon pal tratu colos socios del coto.

Nun podiemos creer que con el preciosu día de sol que había quedao y cola nieve quitao de les partes baxes nun nos fueren dexar cazar nel lote 4, un de los que mejores resultaos estaba obteniendo esti añu. Pero col reglamentu en la mano, así yera. Taba suspendía y nun había manera de da-y torna. Finalmente, colos aires un poco alteraos ficimos tiempu hasta la comida.

Comentariu Gastronómicu:

Fuimos a los Panchos y como siempre un estupendu tratu familiar de Milio acompañao poles abundantes raciones de Callos, pitu, corderu, adobu, postres y chupitos. Un sitiu onde nos sentimos como en casa.

Algunos depués escapamos pal Cuadru en Laviana, onde aguantamos hasta el final Lupio, Muñera, Adrián, Fran, Diego y yo.... somos Leones!!!.

06/11/2010. Area 1. Serín (LLanera). Xabalí

Nesta ocasión tenemos comprada una cacería en Llanera palo que quedamos tempranin delantre de la residencia pa distribuinos en los coches y tirar pal chigre de los cazadores en Llanera, al llau del campu futbol del pueblu. Cuando llegamos ya hay allí otres cuadrilles esperando para organizase y salir pa les areas.

Vamos un poco en pelotes. Lupión nun vien a esta cacería y nun hay monteros contrataos. Tenemos a un par de los nuestros locales y finalmente se habla algo con otros 3 o cuatro de LLanera.
A nosotros tocanos el Area 1, que ocupa terrenos de Xixón. En cuanto estamos todos y el guarda fae el papeleo necesariu, tiramos todos pa un altu, pela carretera que bordea la fabrica de PRENOR en la antigua carretera Uvieu-Xixón. Allí quedamos hores y hores mientres los monteros corten.... ye un poco desesperante, pero al final movémonos. Cogemos los coches y marchamos pa otra zona onde se presumen xabalinos. Ponemos los puestos, entren los monteros nun eucaliptal.... y nada. Ta vaciu.
Retiramos y cambiamos de sitiu, esta vez bastante cerca de la autopista. Los puestos tan colocaos, entren los monteros y finalmente entre la confusión de algún corzu que levanta y algçún xabalí que se supón, sal un de estos de espaldes a la autopista, tira pa una riega y súbela a pinchu, topando con Jose Manuel que-y tira cola escopeta a unos venti metros, ta seguru de habe-y dao, hay rastru sangre, pero el xabalí yera como un demonio y marcha. Los monteros siguenlu un poco, pero piérdese nel monte... nun hay manera.
Finalmente retiramos otra vez de vacio. El monte yera guapu y había rastros per toes partes, pero sin monteros poco podemos facer.

Comentariu gastronómicu.
Nesta ocasión estrenamos local nuevu nel Condao, Casa Pin. El menú que nos organizaron muy de caores. Sopa, Callos con patatines, raxes de lomo y picadiellu. De postre quesu y dulce y flan. Raciones buenes y muy caseres. Lo mejor, tener la parte de atrás entera pa nosotros. Destacar los callos, muy limpios y menudinos, bien preparaos.

22/09/2010 Area7. Les Campes. Xabalí

Segunda cacería de la temporada. Esta vez en les Campes, nel Area 7, onde tenemos pensao copar en llargo, en los puestos altos de Doñango, Pelúgano, La Collaona...

Los puestos tarden un poco en colocase, y nun ye hasta les 10 de la mañana que acabamos. Dexamos a Adrián con la silla en la campera Doñango, que copa el solu y subiemos pa Pelúgano Mieres, Jose Manuel, el Roxu y yo.

Los monteros topen los únicos rastros de xabalí embaxo les Campes, en les mates per onde baxa la riega. Suelten los primeros perros a eso de les 11 y podemos decir que entama entós un circu de perros, monteros y xabalinos que que duraría hasta les 6 de la tarde. Ye dicir, más de 8 hores en puestu a veles venir col únicu entretenimientu de la emisora (a la mia acabose-y la batería asina que lo mio fué peor)

El xabalí al paecer en varies ocasiones quiso salir a los puestos altos, llegando nuna ocasión hasta casi Doñango, pero en toes les veces dió la vuelta sin dar oportunidá a ningún cazador. Quizá el error nun día de veranu como esti fué copar en llargo. Ni perros ni xabalinos taben pela llabor de correr con y así nos fué.

Eso sí, el día, últimu de veranu, fué preciosu, soleau pero sin muncho calor, polo que fué muy llevaeru.

El únicu que vió cerca la oportunidá de tirar a un xabalí fué Muñera, que-y entró pela espalda un despistau, pudiendo haber tirao a placer si nun se hubiere dao cuenta cuando ya lu tenía enrriba suyo.

Primer cero de la temporada.

Comentariu gastronómicu.

Quedamos de nuevo en la terraza de casa Tino en la Chalana. Nesta ocasión el menu de caza incluia aparte de los típicos entrantes frios y calientes y la sopa, un entrecot a la parrilla. Quizá una elección un poco arriesgá. Adecuase a los gustos de una veitena de cazadores con un entrecot que pue ser al puntu, crudu, bien fechu...etc etc, ye complicao, nun fué buena elección. Per otru llau, como siempre una atención muy buena y servicial pa con nosotros.

19/09/2010 Area 1. Tiraña. Corzu y Xabalí

Si bien algunes cuadrilles ya fae alguna semana que empezaron, nosotros estrenamos la temporada hoy y pa entamar bien, esti añu a diferencia del pasau afinamos más nel sorteu y tenemos varies caceries nel preciosu valle de Tiraña, el nuestru area por excelencia. Nun podemos tener mejores perspectives pa esti primer día.
Quedamos a eso de les 7 menos cuartu nel mercau de LLaviana colos guardas pa tomar nota como tolos años de les licencies, los permisos y los seguros. A continuación un cafetín nel local del mercau, repartu de unes gorruques de caza patrocinaes por el restaurante Los Panchos y ya listos tiramos tol mundo pa los Veneros onde tenemos el propósitu de posar el Corzu y si pinta bien el xabalí.
Ya tirando pa los Veneros los puestos colóquense nos pasos de la carretera según se sube y se cierren arriba, pela pista que atraviesa el Cuetu en dirección a Fresneo. Cerramos los puestos na carba que se ve enfrente l´Ordaliegu.
De monteros pal corzu tenemos a Jony, Borja y Omar (el fiu'l Roxu). Una vez en los puestos, entren nel monte pela pista embaxo los Veneros, hay rastru y al poco suelten algunos perros, mientres algún líase con supuestos xabalinos... que nun apaecen por nengún llau. Nun tarden muncho en mover al corzu que rapidamente pasa la mata pela parte alta, siendo avistau por Adrián nel so puestu, na campera que hay saliendo del cuetu. Distíngue-y la cuerna ente el felechu y dispara, pero ye un poco al bultu por cuenta el folleru que tien enbaxo que nun-y permite ver meyor. El corzu afondase na mata y cuando llega al mi puestu ye imposible tira-y, la mata ta muy cerrá y distingolu pela riega,pero está demasio fonda y tapá, asina que aviso a Diego, Mieres y Lupión que ten atentos porque sube pa los sos puestos. Pasen unos minutos de silenciu y empieza el tiroteo por parte de Lupion, nel últimu puestu... pero el corzu nun cae, hay rastru sangre y les emisores zumben, el guarda pide nun tirar más hasta que se sepa que pasa, y de repente Diego avisa que perdona la vida a un corzu... supongo que el guarda amedrentonos, porque al que taba perdonando yera al corzu de Lupio que sube campa arriba...un despiste que por suerte nun tuvo mayores consecuencies. Esperamos a ver si siguen el rastru y dan cola pieza, pero esti piérdese na carba ente el felechu dando por fecho que quedó encamau, asina que reunimos cazadores y copamos tola carba hasta arriba.

Una vez nos puestos entren los monteros y na más entrar salta el corzu a los pies de onde tábemos y pero el muy cabr... torna pa la mata d´onde acababamos de quitar los puestos. Algunos cazadores baxamos pa tornar a ponenos na zona anterior tando atentos a les emisores, solo ta suelta la perra de Jony que va tras esti, falen de soltar más perros pero nun saben a qué altura ta, nun se oye cantar a la perra así que suponemos que ta ya muy fonda cerca el rio. Al poco Jony confirma que sigue a la perra..., paez que la perra calla y tememos que diere la vuelta, pero nun ye asina!!!, Jony avisa pola emisora que dió cola perra, el corzu taba entregau en medio un camín, cerca ya del pláganu, tien una pata d'alantre colgando y na culera falta-y en rabu.. (los efectivos tiros de Lupio). Jony acaba la faena corando al corzu limpiamente y lu baxa al pláganu a la espera del guarda. Una vez sacau a la carretera facemos les fotos de rigor colos dos protagonistes del lance.

El corzu pa ser de batida ye guapu, completu y con una roseta curiosa, falta-y un poco grosor, pero nun ye feu. Ye difícil matar un corzu pero más difícil ye repetir y eso ye lo que fizo Lupión, por segundu añu consecutivu tien la suerte de posalu. Enhorabona!!!

A continuación, depués de la breve charla nel pláganu vamos pa la Zorea, onde ta localizau un xabalí nel mesmu sitiu onde l'añu na última cacería echamos los venaos, ente la pista que sube a lo de Lauriano y los praos de Rifaeo, asina que copamos de la mesma forma. Esta vez tocáme a mi xunto a Diego, Pedro y Manolón a lo fondero de Rifaeo.
Pal xabalí contamos con Quico'l del Condao, Adrián y Ovidio con Rex.
Suelten los perros y sal el xabalí que se dirixe hacia Ramiro, esti apunta pero la bala nun sal... el semiatumáticu nun ta bien montau y falla, teniendo que apartase del xábalo que casi lu atropeya. Fran que ta cerca intenta llegar pero nun y da tiempu y el gochu escapa colos perros detrás.
Rapidamente los que pueden retiren pa colocase nos puestos de Fresneo y la zona de Ricao, algunos que tamos fondos en Rifaeo tardamos y llegamos los últimos al puestu. Yo colócome con Adrián na zona de la campurrina, pero paez que el xábalo ta nos falleos embaxo Fresneo y piensen echalu pa lo alto. Hay algo de confusión porque los perros dan vuelta, pero enseguida Quico demuestra la so experiencia y dirixe a los monteros hacia onde piérdese'l rastru, el xabalo taba parau esperando a los perros, yera peligroso y Ovidio avanza con Rex pa ver su iendo él saca al gochu, y asina ye, suelta al Rex y consigue que'l xábalo avance hacia Riaco, esperamos impacientes y por fín los tiros lleguen. Muñera col so Sauer semiautomáticu consigue acerta-y cuando pasa algo fondu pol so puestu. Adrián y yo vamos col todoterreno hacia allí onde tamién ta Jony pa cargar el impresionante xabalí que había caio, con Rex al par curiándulu.
El preciu que hubo que pagar nesti casu fué el un de los perros de Quico con 15 puntos nun costau. Con razon daben vuelta los perros. Nun yera pa menos, podeis ver nes fotos a lo que nos tábemos enfrentando.

El resumen de la cacería ye Espectacular!!!, Nun podemos empezar mejor la temporada. Una cacería preciosa na que se trabayó muncho y na que, porque nun decilo, tuviemos muncha suerte. Tanto corzu como xabalí dieron muncha guerra, pero finalmente les coses salieron bien.

Pa inmortalizalo ficimos la primer foto de cuadrilla de esta temprada en Tiraña. Por tercer añu conseguimos cazar el corzu, cosa que poques cuadrilles pueden decir. Nestes 4 temporaes nel Raigosu la cuadrilla consiguió abatir un total de 5 corzos en 4 caceries.

Comentariu Gastronómicu

Esti añu quisimos entamar probando un local al que nunca habíemos dio si bien todos conocíemos. Restaurante Casa Tino, na Chalana. Quedamos a eso de les 20:30. Pal que nun lu conoza ye un sitiu muy afayaizu con una gran terraza, munchu espaciu fuera y dentro y nel branu un de los referentes del terraceo de Laviana, tando siempre llenu de vecinos de toes partes del conceyu, siendo además llugar onde se celebren munches de les fiestes del pueblu.

El menu de caza que nos pusieron improvisadamente fueron unos entrantes frios y calientes, una sopa de pescau/mariscu (muy buena) y parrillada (un poco recalentada, aunque ye culpa nuestra por avisar tarde), buenos postres, cafes y chupitos. Destacar un muy buen serviciu, sin que por ello el preciu subiere dexagerao.

Sin duda otru sitiu más pa añadir a la nuestra lista gastronómica de caza.

Branu 2010

Una vez finalizaes les batides del añu entamamos les diverses actividaes que tienen llugar a lo llargo de la primavera y el branu ente les que tuviemos recechos, concursos de perru rastru en Villaviciosa y Nava, sueltes de perdiz en Camposagrado (León) pa los perros de caza menor y tiro al platu en Migalpiri (Laviana).
Nesta foto tenemos un par de cabeces de los corzos que mató esti añu Adrián, nos recechos que tuvo en Villaviciosa y Nava nel mes de Abril.

Aunque la foto ta un poco lejos, los corzos son completos, con buenes rosetes y muy perlaos. Superaron los 100 puntos en medición de campu y pa Asturies pue dicise que son buenos trofeos.

Pela mio parte receché nel mes de xunu, nel nuestru coto de Laviana, nes areas 4, 5 y 6 que incluyen el valle de Llorio, Villoría, L´Acebal....

Na mañana del segundu día de recechu estuve apoyau por Luis Mieres y Adrián que controlaben la zona de la Gabilancera donde teníemos controlau un buen corzu. El guarda Revuelta, el so tiu y yo tiramos más cerca de Laviana, na zona del Entrialgo. Allí fué onde tuve la ocasión a les 10 de la mañana de posar un peculiar corzu. Contamos cola estimable ayuda de Fran (del bar del Entrialgo) que nun dudó en avisanos de la presencia de la parexa nun prau pel que habíemos pasao 25 minutos enantes sin haber visto nada. El disparu fué un poco apresurau dende la pista, a unos 190 metros. Una vez sacau a la pista y feches les primeres fotos, llevámoslu pa Villoria onde lu limpiaños y facemos el correspondiente papeleo pa poder llevalu.

Como podeis ver, el corzu tien 4 cuernos y 9 puntes. Un de esos casos que poques ocasiones na vida se-y ponen a un enfrente y que hay que aprovechar.

A ver si el añu que vien tenemos la mesma suerte.

Feches sorteo. Temporada 2010/2011

Esti vienres 9 d' Abril, asistimos al Sorteu de caceries Lupión, Fran, Jose Luis (Fiu), Muñera y yo.

A continuación os facilitamos les feches de la nuestra cuadrilla. Pa elexir les caceries basámonos como siempre en dos prioridaes. Fecha (Sábado y Domingo) y na presumible calidá del Area. Finalmete queda asina:

1. -Domingu 19 Setiembre 2010. Area 1 Tiraña. Corzu y Xabalí
2. -Miércoles 22 Setiembre 2010. Area 7 Les Campes. Xabalí
3. -Sábado 6 Payares (Noviembre). Coto de LLanera. Xabalí
4. -Miércoles 1 Avientu (Diciembre) 2010. Area 4 Soto. Xabalí
5. -Miércoles 8 Avientu (Diciembre) 2010. Area 6 Villoria. Xabalí
6. -Sábado 11 Avientu (Diciembre) 2010. Area 8 Carrio. Xabalí
7. -Miércoles 29 Avientu (Diciembre) 2010. Area 1 Tiraña. Xabalí
8. -Domingo 30 Xineru (Enero) 2011. Area 2 La Ferrera. Xabalí
9. -Domingo 6 Febreru 2011. La Portiecha. Pola de Lena. Xabalí.
10. -Sábadu 26 Febreru 2011. Area 1 Tiraña. Venao.

Así mesmo tocáronos 2 venaos (Fembra) en recechu. Un de conseyería y l´otru del Raigosu.

Corregimos, la vená que nos había tocao col Raigosu fué anulá (xunto al resto de les adxudicaes a toles cuadrilles) por cuenta de una acción escontra el coto de xente de la sociedad de caza "Puerta de Redes".

10/02/2010. Area 1. Tiraña. Venao

Última cacería del añu, esta vez en Tiraña, onde esti añu nun tuviemos nenguna cacería. Los venaos llevaben tiempu controlaos ente la Zorea y Rifaeo, nos eucaliptales enrriba Lloro. Na zona taben encamaos ente 5 y 8 venaos.
Nun madrugamos muncho y quedamos na cafetería Nagasaki en los Barredos, d'onde salimos a eso de les 8 y media pa colocar los puestos. Repartímonos en dos grupos, unos que subirien dende Tiraña pa los praos de rifaeo y otru de los que subiemos pela Zorea pa copar la pista que sube pa lo de Lauriano.
Comienza la echá y na más entrar los perros na mata algunos "observadores" ven los venaos movese, separándose éstos en dos grupos, un con dos machos que suben pela zona de rifaeo y otros tres que tiren pa la zorea, nel que se encuentra al paecer un buen trofeu.
Enseguida empiecen a llegar los venaos a los puestos. Yo toi de llau de Jose Manuel, más abaxo Jose Luís y enrriba mio Lupión. Salnos nunca cruva un venau xoven, sin casi cuerna que ya había tenio a tiru Jose Luís más abaxo, pero lu dexamos pasar, un buen trofeu seguia metiu na mata y sería l'últimu en salir, asina que había que tener paciencia.

Xusto cuando pasa'l venau, pela emisora oyese algo que nun se distingue bien... dicen algo asina como "ya está, acabose..." nos preguntamos que qué pasa, porque nun oyimos nengún disparu... pero pela emisora nos lo confirmen. En Rifaeo salieron un par de venaos tamién xóvenes y abrieron fuego, posando Luis Mieres un en suelu. El día había acabao a eso de les 10 de la mañana y baxamos toos pa Tiraña pa ver la "pieza".
Aquí teneis la foto pa valorar vosotros mesmos.

Comentariu Gastronómicu

La comida fué nel restarurante Cervantes, situau na Carretera Xeneral de Llaviana, al llau del bar el Raigosu.

Nun había muncha xente y tuvimos agusto. Punsiéronos un menú habitual pa cazaores.

Sopa y parrillada, si bien pa quien quisiere pescao nun tuvieron problema en preparalo, (como ye el mio casu) postre y chupitos. Faltó bastante xente y el detalle de que nun se pudiere fumar nun-y sentó bien a tol mundo. Ficimos una buena sobremesa na que dio tiempo a falar de todo.... hasta de política

Na foto podemos ver a Luis Mieres satisfechu col magníficu trofeu cazau. (jeje, nun te lo tomes a mal Luis).

06/02/2010. León. Xabalí

Por fín, dempués d' un par d´años retrasando esta cacería no que fueron más de 6 intentos, con cambiu de coto incluiu, vamos a facela realidá.
Quedamos bien temprano en Llaviana, delantre del ambulatorio, pa dir por San Isidro hacia la zona de caza cerca de la Vecilla. Paecía que la xente conocía bien la zona, pero les tierres cazurres deben engañar muncho, porque nun descuidu casi calamos a León... asina que damos la vuelta y conseguimos calar al bar onde ya tan reunios los cazurros que nos esperen. Tomamos un cafetín y algún pinchu que por cierto nos salen realmente baratos (jeje) y dirixímonos nuna llarga procesión de más de venti coches al area que vamos a cazar.

Llegamos a un mar de robles y pinos cruzau por pistes, el llugar ye impresionante y empiezen a colocase los primeros puestos onde van a entrar los monteros nel monte, vese muncho rastru de caza na zona.

El restu tiramos pa rodear l' area y colocar los puestos a la otra parte, faciendo parte del camín a pie. De la que dibemos andando pela pista colocando los puestos, falábamos Adrian, Fran y algún otru sobre experiencies colos xabalinos, cuando de repente miro pal frente y veo un tremendu xabalín a un llau de la pista que tabemos subiendo, a unos venti metros de nosotros. Coméntolo al restu y Fran se rie creyendo que taba bromeando, de repente detrás del xabalí salen otros 4 pa cruzar la pista, ármase un trepe de la de dios, acerrogiando, cargando los rifles... los cazurros algo pasmaos...y boom, descerroxen un tiru al últimu de los xabalinos, que queda na pista heriu aturullando hasta que un de los cazurros acércase col puñal y con un poco ensañamientu lu remata.

Paez que pinten bien les coses y que na zona hay xabalí, asina que animámonos y acabamos de colocar los puestos. La realidá yera bien distinta. Aquellos yeren los únicos xabalinos de la echá y habien escapao. Nun había muncho que facer, asina que esperamos a que los monteros recojan y nos vamos, cargando Jose Luis (fiu), Fran y yo col xabalo que esta vez ye pa Adrián y Jose Manuel.

Por causa xustificá, axena a la cacería decidimos retirar y acabar el día. Nel camín de vuelta, de la que tiramos pa La Robla en dirección a Pajares paramos al llau de una riega pa llimpiar el xabalí, momentu que aprovechamos pa facer una foto na que vemos a Jose Luis (fiu), Lupión, Adrián, Gelu (Monteru) y agachau Fran.

Mientres algunos tienen que marchar por tener compromisos inesperaos, el resto decidimos comer nun restaurante conociu por munchos de los que cacen en tierres leoneses y tornen por Pajares; el "Mesón Reondu" en Campomanes. Llegamos bastante tarde, a eso de les 5. La comida y la sobremesa dura bastante porque hay muncho de que falar y nun ye hasta les 7 que tiramos pa Llaviana.

Comentariu Gastronómicu

Nesta ocasión, y tando fuera del pueblu, elegimos un local que algunos ya conocien, famosu pol so expléndidu y gran menu. Llamase el Mesón Reondu y está en Campomanes.

El menu expectacular, si bien desproporcionau. Mejillones con diferentes salses, Sopa de Mariscu, Callos con patates, Fabes, Bacalao al pil pil, Pitu Caleya, Corderu, postre, cafés y chupitos. Pa reventar!!! Estaba todo muy bueno, pero el pitu y el corderu sobraben, nun podiamos comer más, menuda fartura y nun ye caru. Pal que nun lu conozca y tenga buen saque tien que tenelu en cuenta.

Nun quiero cerrar el relatu sin facer una mención especial al nuestru compañeru y amigu Armando Usín Andrés que fallecía n' esti triste día.

Tus compañeros de cuadrilla mantendrante siempre nel recuerdo. Descansa en paz.

24/01/2010. Ponga. Xabalí

Del comienzo del día nun me acuerdo muncho, porque estaba algo "dormido", se que paramos en algún bar del pueblu a tomar café y de siguio fuimos a la caseta del guarda a dar los datos. El guarda yera un gallegu un poco repunante, que puso problemes colos seguros. El día nun tenía buena pinta, frio y lluvia y lo peor, nun había buenos pronósticos de xabalinos en monte.
La cosa nun taba clara, asina que mandamos a los monteros a cortar monte, a ver que pasaba y nosotros tiramos pa Beleño.

En Beleño lo mejor que ficimos fué metenos nel chigre de un madriles inmigrau, onde echose tranquilamente la partiuca mientres tábemos atentos a la emisora, a ver si nos anunciaben algo, Xugaben Fran, Mieres, Muñera y el Ruxu. Entre les cerveces, los cafetinos y los churros que pidió Manolo tabemos como dios. Fuera'l frio pelaba y nun paraba de llover, asina que mejor nun podiemos estar. Como pué vese na foto, ni ganes teniémos de tirar pal monte.

Nun momentu dau avisen que pue haber xabalí enriba el pueblu de Tanda, onde Lupión diz que el Rex canta algo, asina que ponemonos en marcha, aparcamos los coches na parte alta del pueblu y metémonos per unos caminos que paecien rios del agua que llevaben. El paseu fué toda una azaña, ente los barrizales, los praos nidios, incluso nel pasu de un riu que normalmente pasase sin problemes pero cola que taba cayendo venía cargau hasta el alma. Paez que no, pero taba guapino... y al final, pa ná. Colo camos los puestos rodiando una mata, entren los monteros colos perros y na de na, de na. Rex nos había fallao.

Como nun da tiempu a cortar más, baxamos y tiramos pal pueblu de Taranes, la verda que yo y algún más, col frio y la lluvia que facía hubiéremos preferio tirar pa casa, pero bono, proponien una última echá y teniemos que ponenos a ello, Faustino y Quico en cambio decidieron marchar, que ye lo mejor que ficieron.

Dibemos a copar el monte d' enfrente el pueblu, dende' l pasu que tira pal Tiatordos hasta tol cantu de la peña. A mi, tocame precisamente nel pasu, a onde vopy xunto a Muñera y el Roxu.

La verdá que puedo dicir en serio que esti fué'l peor día de caza que yo pase hasta hoy. Nesti puestu allí parau, enriba'l rio taba'l aire que cortaba, la lluvia comenzó a tornase en nieve y yo quedé entumeciu del too. Poles emisores nun se dicía na y el tiempu pasaba y la verdá, yo solo pensaba en marchar.

En un momentu dau oyense unos tiros, el guarda hasta creería que tabemos tirando a los Rebecos que había per allí o algún llobu, que habíen dexao nel corte los restos de les cabres... pero no, sin comelo nin bebelo y sin que los perros ficieren na, salieron de la mata dos xabalinucos que foron a topar con Luis Mieres que posolos en baxo. El día había acabao y pesie a todo habíemos matao, yo ya nun veía la hora de tornar pal coche y marchar.
De allí colamos pal primer bar onde paramos a tomar un café cuando llegamos, tomamos un calducu y marchamos pa Llaviana, onde quedamos pa cenar nel Guaje, onde falló della xente y la mesa quedó a la mitá.

Comentariu Gastronómicu

Repetimos na sidería El Guaje en Laviana. Como siempre tanto la atención como la comida estupendos. Sopa de mariscu, Parrillada variada con fritures (muy buena), postres, café y chupitos.

02/01/2010 Area 8. Carrio. Xabalí

Última batida de xabalí d´esta temporada nel coto y una de les poques veces que cazamos de sábado. Pese a amanecer tarde, quedamos bien temprano na gasolinera de LLaviana, a eso de les 7. Hay mieu de que los xabalinos pasen pa San Martín y la primera echá quieren que sea lo antes posible, polo que cuando tamos todos, destinamos rápidamente pa copar la zona de Carrio, detrás del Pozu Carrio. Yo tiro pa Blimea pa subir al llímite con SanMartín, onde tan varies bocamines de Rimoria. Vamos Jose Manuel, Lupión, Adrián, Jose Luís (padre y fiu) y yo. Nestos mesmos puestos el fin de semana pasau otra cuadrilla de Tiraña mató bien temprano 3 xabalinos, así que hay esperances de tener éxitu.
Comienza la echá y nun hai novedá, va pasando´l tiempu y vemos que la zona está vacía, algún corzu que marcha espantau pero xabalinos cero. A les 10:30 de la mañana escuchamos detonaciones nel Area 1... acababen de matar un par de xabalinos asina que pa ellos el día termina bien temprano... cagon ros...esta temporada nun tamos finos.
Como ésta echá nun tien futuru retiramos, esta vez pa cubrir enrriba de Canzana, casi enrriba del restaurante, na curva enantes de esti. Si nun fuera por un guaje que con una emisora nos tuvo amargando la existencia una hora y media, hubiere sio una echá igual que la anterior, aburría y sin un xabalí, y enrriba entamaba a orbayar.
De nuevo retiramos y vamos hacia los montes enfrente del pueblu del Meruxal, más allá de los Fornos, pueblu nel que l' añu pasau matamos un estupendu xabalí.
Ponemos los puestos, yo estoy con Pablo y Jose Manuel cubriendo una riega na parte alta, el restu está detrás nuestro nel altu. A la nuesa altura pero nuna pista de enfrente vemos a Pedro cerrando la echada.
Ramón anuncia que tien un xabalí y suelta los perros, tamos atentos porque suben pela riega hacia nosotros, Pedro da avisu de que ve los perros y el xabalí na riega asina que tamos espectantes a ver si sigue palantre y topa contra nosotros, pero' l xabalí nun ta pela llabor y sal de la riega, cortando monte arriba en dirección a Pedro, oyese pela emisora que avisen a Pedro pa que tea atentu, y el resto quedamos nun silenciu incómodu a la espera de lo que pase... se oye un disparu y llueu silenciu... ¿matarialu? naide diz na, nun sabemos que pasa pero' l xabalí sigue la so carrera, voces pela emisora, preguntes...un poco de kaos y nada, el xabalí había escapado después de un percance de Pedro con el arma y los sos guantes. Mejor nun recordarlo, jeje.

El día nun da pa muncho más. Avisennos pela emisora que un paisanu vió rastros de xabalí bastante cerca, en una zona que vemos nel monte d' enfrente, enrriba la Meruxal. Dirixímonos hacia allí pa una última echá pero na, la zona está vacía.
Un cero patatero pa esti día del cual por nun facer, nun fice nin fotos.

Pa la cena repetimos nel Guaje en Laviana a les 8:00.

Sopa de mariscu, parrillada variada y lenguau, postres, cafés y chupitos . Todo muy bien, como siempre.