29/12/2009 Area 5. Los collaos. Xabalí

Bueno, el día 6 toconos nos Collaos y pa variar quedamos pela mañanina en L´Acebal pa tomar algo. Acompañonos de guarda Pepe. La copar separámonos en dos grupos, tirando unos pa los Collaos y el resto subiendo pela Gabilancera, grupu nel que diba yo con Lupión, Muñera, Adrián y Jose Manuel viendo pel camín dos venaes. Copamos hasta llegar al linde con Sobrescovio.

La echá nun duró muncho, enseguida los perros toparon rastru y salió un xabalín que cruzando la riega caló en dirección a los Collaos, onde lu taba esperando Armando. El lance fué curiosu puesto que pela emisora Pepe el guarda retransmitiolo en directo. "Ya sube, vete encarando, apunta, dispara...." y ya está, xabalín en baxo de un solu disparu. Armando repetía y facía el so segundu xabalí d´esta temporada.

La zona quedó vacía y retiramos, echando de la que marchábemos un par de perdices. Tiramos pa onde Adrían (Corián) paecía tener cortaos los xabalinos, nun cruce ya cerca de L´Acebal, pero tras ponemos nos puestos en medio la lluvia, lo único que vimos fue a los del culu blancu.


El día nun dió pa más, asina que retiramos y quedamos a les 8 nel bar del Acebal pa comer el corzu que teniemos de la segunda cacería.




Al día siguiente, Armando y yo esfollando el xabalí nos Veneros.

29/11/2009. Area 2. La Ferrera. Xabalí

Por cuestión de feches, tuviemos que esperar un mes pa volver a cazar. Algunos nun aguantaron, como ye´l casu d´Adrián, que con más xente de LLaviana fué pa Teruel a cazar un buen trofeu de Macho Montés.

Pela nuesa parte, esti día tocábanos el Area 2 y como ya tamos avezaos, quedamos a les 8 la mañana nos Panchos, nel Condao. Por primera vez nesta temporaba tebemos los 16 de la cuadrilla, polo que Lupión decide dir a montiar con Rex. El plan yera poner los puestos na zona de Fresneo y que los monteros cortaren monte, a ver si sonaba la flauta. Asina que subiemos pa la campa Fresneo y el guarda fué destinando. Nel mio casu nel cantu de Peña Mayor, nun buen pasu que hay enrriba Fresneo. Lo único destacable aparte del frio que pasamos algunos, fué ver 4 venaes cruzar la campa Fresneo tranquilamente, pasando delantre los coches en dirección al Area 1, nun se si toparien a los que taben cazando la menor en cuadrilla nesa zona, pero muy nervioses nun diben, por desgracia na foto nun se aprecien.

Tuviemos nestos puestos hasta media mañana sin que los monteros tuvieren na localizao, asina que una vez visto que nun había futuro ahí y ya algunos tarazaos de frio, decidimos retirar y poner nuevos puestos na Campa los Difuntos, onde permanecemos hasta mediu día, sin que de nuevo haya novedad. Fran retira nesi momentu a trabayar, quedando 15 cazadores, si bien Lupión sigue montiando.

Retiramos y marchamos hacia´l pueblu del Pando, onde Lupión tien cortaos los xabalinos. Tienen que esperar bastante hasta que llegamos, porque la marcha dende la Campa los Digundos hasta el Pando ye lenta y penosamente por cuenta de una pista en obres, inundao de barro, colos todoterreno culeando y teniendo que parar cada poco, en una lenta procesión que por fín nos llevó al pueblu siendo ya casi les 4.

Reunímonos todos y organizamos el despliegue, un poco arriesgau, de los puestos rodiando un gran matu. Copamos bien y a conciencia, pero los puestos taben muy xuntos y les posibilidaes de repetir tiru yera reducía, puesto que al tar tan encima del matu, solo podía tirase nel momentu de salir el xabalí hacia nosotros, porque enseguida saldría per entre los puestos y quedariemos en línea unos de otros, lo que facía imposible tirar pol riesgu de salir algún heriu.

Ya alertaos, precavidos y atentos, suelten los perros nel matu y comiencen los nervios, los perros nun dexen de llatir y el matu muévese, al poco tiempu intuyo salir un xabalín del matu, pero la maleza nun permite ponelu bien a tiru, va a salir ente Faustino pero paez que se lo piensa , asina que abro fuego antes de que de el saltu, pero nun cae; salta de la mata y vuelvo a abrir fuego a la vez que Faustino y nos pasa ente los dos entrando na mata, corro pala mata y cuando lu tengo a tiro disparo, viedolu caer, acércome y pa mi sorpresa vuelve a levantar, ya nun me queden bales na recámara y tengo que velu marchar per detrás de los puestos, si bien veo que ta tocau, el suelu ta llenu sangre y va dexando un buen rastru, na carrera los disparos se suceden, Manolo Corte, Armando... hasta que finalmente los perros alcancen al xabalín y mientres lu entretienen, Adrián remata con un certeru tiru nel costau.

Seguimos nos puestos porque los perros siguen llatiendo, aunque nun sabemos si como paez, hay más xabalinos, o tan llatiendo´l gochu muertu, el tiempu pasa y algunos dudamos... pero finalmente sal un xabalí por sorpresa, esta vez ente Jose Luis (Padre) y Adrián, que tiren pero lu fallen. El día había acabao.

Una vez cobrada la xabalina comprúebase a primera vista que tien dos disparos, un nel costau, responsabilidá de Adrián y otru nel xamón drechu, que-y entró pel interior, esti miu, polo que me lu asignen por ser primer sangre.

Quedamos todos na Ilesia del Condao, esperando a ver si se corta algo más y comentando´l día, aprovechando´l momentu, Muñera y yo nos acercamos al rio pa limpiar la gocha, onde aprovecho pa facer la foto de rigor.

Quedamos a les 8 nos Panchos pa cenar y ver el partiu del Real Madrid y el Barsa (que como tol mundo sabe acabó 1-0 a favor del Barsa), siendo que algún prefirió velu en casa y perdese la cena (allá ellos).

MENU LOS PANCHOS:

Sopa, Callos con patatinos, Corderu a la estaca, Carne Guisao, Postre, Café y Chupitos.

Corrección:

Estos díes entereme que una vez esfollau´l xabalí por Luis Muñera, descrúbese que tenía en realidá 3 tiros, el miu nel xamón, el del costau de Adrián y un terceru que entra pol cuello y sal pol mesmu costau onde-y dio Adrián, siendo lo más probable que esti tercer tiru fuere de Faustino, cuando disparó a la vez que yo, polo que en realidá la xabalina debería haber sio asigná a él.

28/10/2009. Area 6. Villoria. Xabalí

Repetimos la zona de Villoria, onde na segunda Batida del añu abatimos dos corzos y un xabalí.

El día fué axetreau y muy cansau. Acompañonos nun inicio los guardas Pepe y Revuelta, entamando una echada na zona de Fresneo sin éxitu, onde lo único positivo fué ver levantar unos bandos de perdices.

Ya sin Pepe, repetimos echada rápida na mesma zona, pero también sin éxitu y ya son les 11, asina que retiramos hacia´l pueblu de los Tornos pela pista y cogemos la pista que se dirixe a los Collaos, dexando los coches a un llau del camín pa poner los puestos de escopetes abaxo nun falleru. Díbemos el Ruxu, Corte, Pedro y yo, acompañaos por Aladro.

De nuevo fracasu, solo salió un llabascu en el corte ente Armando y Jose Luís (Fiu), esti último tira pero falla. Marchamos algo decepcionao.

Retiramos y tomamos algo antes de facer una nueva echada en la zona de la Pomarada, nuna castañal onde los perros marquen presencia xabalí. Copamos la mata y entren los perros, pero d´allí solo salen corzos... disponemonos a retirar y cuando algunos ya tábemos nos coches, los monteros que vienen rezagaos, suelten un par de perros y sal un xabalí, dan avisu pela emisora y salimos unos cuantos escopetaos a cubrir los puestos, pero ya ye tarde....el xabalí escapa ente protestes de un y otros poles culpes pasaes.... pero son coses de la caza, la suerte ye asina, esi xabalí nun yera pa nosotros.

Son les 5 y retiramos pa intentar una última echada, esta vez na zona de Fechaladrona, onde mató Armando´l xabalin el día 7, pero se fae de nueche sin resultau algún.

Solo faltonos haber mirao´l Roxil, pero´l día nun da pa más, nun se pue dicir que no lo intentamos, los monteros trabayaron bien, fuimos a toles zones del Area 6 onde a priori podía matase, pero la caza munches veces ye suerte, y esta vez faltonos esta, pa la próxima vez será.

A falta de fotografies, nesta ocasión colgaremos un video facilitau por Luis Mieres con la berrea de esti añu nel coto, nesti casu na zona de LLaimo (Reigosu).

Menu Los Panchos:

Sopa, Callos con patates frites, Chuletes de gochu, Corderu asau, postres, cafés, chupito y lo que tercie...

Comunicau Cuadrilla:

Queremos dar ánimos al nuestru amigo y compañeru, monteru asiduo de la cuadrilla, Pantiga, que vio como nel fin de semana anterior yeren alcanzaos dos de los sos perros por un Xabalí, quedando un d´ellos muy grave temiendose pela so vida, siendo que a día de hoy por suerte paez estable y se va recuperando.

Un abrazu.

11/10/2009 Area 3. El Condao. Xabalí

Nueva batida, Domingu 11 de Ochobre nel Condao. El día amanez con borrina y orbayu, así que aunque subimos a los puestos nes Carranques, nun vemos na y limitámonos a esperar que los monteros corten algo nel monte mientras despexa el día. Yo subo con Pablo y enfrente va Faustino col Roxu y Kiko. (escopetes y 30-30).

Colocámonos por si suena la flauta pero pa les 11 la mañana confirmen que nun hay nada... recogemos les coses y vamos pa los coches, quedando abaxo nun cruce pa reuninos y repartinos.

Mientres que los que llegamos primero esperamos disfrutamos del espectáculo de ver como nos pasen a unos 100m na carba d´enfrente 2 venaes con cries y un macho bastante decente.

Una vez reunios, unos tiren poles pistes pal cantu, na zona del Argallón y el restu, Muñera, El Roxu, Corte, Pedro y yo xunto col guarda Javier baxamos pa La Aldea y tiramos rodiando pal puestu.

Copamos un bosque con urcies, estando los monteros nel altu a la espera colos xabalinos localizaos. Soy l´últimu en colcame, nun peñeru con tiro corto de escopeta.

Empieza la echada y paez que hay de todo, nada más soltar los perros salta embaxo mio ente los felechos, a unos 10 metros un buen venao y como per onde pasa´l venao pasen los xabalinos... baxo un poco y prepárome a recibilu. Al poco tiempu, per enrriba mio empieza´l tiroteo, salen 5 o 6 xabalinos, Pablo vacía 2 veces el cargador contra una xabalina que cae abatida cola boca desfecha y a un llabascu al que tamié-y tira Jose Luís (padre) sin confirmar muerte. Nesi momento Javier el guarda ponsenos algo nerviosu y pide la confirmación, nesos momentos pasa un llabascu por debaxo mio, per onde había pasao´l venao, nun disparo y llega hasta el Roxu, que tampoco dispara. Jose Luis (fiu) avisa pela emisora que tien xabalín a tiru pero el guarda manda parar y nun dispara, llueu escuchase otru disparu (creo que d´un de los Veneros) y el guarda amenaza con suspender la cacería... escapen tolos xabalinos y quedamonos cola gocha confirmándose que nun habíen alcanzao al segundu xabalín, nesos momentos ya nun facemos nada allí, yeren les 3 de la tarde. El monte quedó vaciu, así que baxamos, llimpiamos la xabalina y montamos la nueva echá.

Los que tan nel cantu apóstense pal otru llau, y los que tamos abaxo coxemos los coches y vamos pa la gasolinera de Rioseco, pa metenos hacia la Braña, lindando cola Reserva. Muñera, Corte, El Roxu, Pedro y yo nun llegamos hasta los puestos hasta les 5 de la tarde, en que comienza la echá.

El mio puestu ye nun prau con felechos pela parte de arriba, na cresta de enfrente diviso a Armando y a Jose Luis (padre), detrás mio más arriba está Pedro.

Pasa el tiempu sin novedad... y ya cuando se quitó el sol tras la cresta, casi a les 6, sal d´improvisto un xabalí na mio zona, dexuru procedente de la anterior echada. Debía habese puesto nerviosu, puesto que nun había monteros cerca. Siéntolu baxar rompiendo el felechal sin poder velu, prepárome, pero sin tiro seguro nun me arriesgo, finalmente veolu un momentín nuna zona más despexao, ye un llabasquín como una liebre de grande, disparo y fallo, sigue por el felechal y cuando sale hacia la mata vuelvo a disparar pero tamién fallo perdiéndose ente les castañales.
Comenten que retiramos y mientres baxen los monteros de enfrente mio en mi dirección, (Kiko y Fran), saltayos un venao enorme entre les urcies que revuelvese contra ellos, teo una visión privilexiada dende´l monte d´enfrente y ye un espectáculo, el venao finalmente recula y escapa rompiendo monte hacia el rio...

El día acaba con una xabalina, sin facer el cupo de dos xabalinos. La paralización de la echada pol Guarda y llueu´l mio fallu frusta la buena estadística que llevaba la cuadrilla. Tomamos algo nos Panchos onde facemos la foto de rigor de Pablo col so trofeu, y vamos a aseanos pa dir a cenar.

Retiramos y quedamos a les 20:30 pa cenar, la cuadrilla estrena restaurante nuevo en Llaviana, El Guaje. El día coincide coles fiestes de la Pontona y ta LLaviana hasta arriba.

Menu Sidrería Restaurante EL GUAJE:

Sopa, lenguau con vinagreta y mayonesa, parrillada (chuletones, costilles, criollu, pitu...), postres, cafes y chupitos. (La verdad que quedamos muy contentos col sitiu, habrá que repetir).

Comentariu de la cuadrilla:

Desde esti Blog queremos condenar la distribución por parte de algunos desgraciados de despojos de carne envenenao en varies zones del Coto, afectando en especial a la zona de la "Campa los Difuntos", que tuvo como consecuencia la muerte de varios perros, ente ellos un de los perros del nuestru compañeru y amigo Lupión, xefe de Cuadrilla, que tuvo que ver morrer en les sos manes a un cachorro de 2 años fiu de Rex, el cual tamién viose afectau, si bien sobrevivió.

Acciones como esta nun solo suponen un gran peligru pa los nuesos perros, sino que dan pie al asesinatu a todo tipo de fauna sin distinción; raposos, xabalinos, aves carroñeres...

A la espera (sentaos) de que el SEPRONA tome les medies oportunes, animamos a los amigos del Coto a denunciar esti tipu de actividaes delictives y dañines pa cazadores y amantes de la naturaleza.

07/10/2009 Area 6. Villoria. Corzu y xabalí.

De nuevo Miércoles, ye nuestra segunda batida de la temporada y esta vez toca Corzu y Xabalí nel Area 6, en Villoria. Reunímonos tola cuadrila en Los Panchos a les 8:00 la mañana, el día pinta mal y nun dexa de llover. Esti día somos 11 cazadores y unos 6 o 7 monteros. En los Panchos coincidimos con otra cuadrilla que van a cazar al Area 4 en Soto, onde matamos nosotros 3 xabalinos el miércoles anterior. Quedamos una media hora todos a techu esperando a que abocane, lo que nos retrasa hasta casi les 9 la mañana.
Cuando paez que abocana salimos colos todoterreno hacia Villoria, yo con Fran (el de Kiko) y delantre el resto. Dirixímonos hacia Fechaladrona, quedando los coches nuna curva enantes del pueblu. Vamos a echar una mata al pie de la carretera que afirmen que tien Corzu. Ponemos rápidamente los puestos y empieza la echá marcada por una intensa lluvia. Esta primera acaba rápido sin éxitu, pero polo menos para de llover.

A continuación movémonos y nos internamos todos los cazadores na mata un cachu más abaxo d´onde dexamos los coches. Vamos colocándonos por la pista que sube per en medio la mata pa copar los pasos. Yo quedo cola escopeta nel puestu de más abaxo. Na curva de arriba colócase Pedro y más arriba Fran, ambos con rifle. Veo pasar a Luis "Muñera" pa colocase pista arriba, por enrriba mio.

Una vez colocaos dan orden a los monteros de entrar y de seguio suelten los perros pal corzu de Lupión y Adrián (Veneros), oigo un cascabel acercase pela mata enfrente mio y prepárome, pero pasen altos y nun los veo, polo que oigo como se alexen pa mi derecha en dirección al puestu de Pedro. Nun se si seguirán altos o descolgaránse a la pista, así que toi atentu mirando hacia arriba cuando veo a unos 30 metros, nuna curva detrás de unos ablanales saltar al corzu na pista, de siguio escucho un fogonazu de Pedro que falla y salto al camín pa intentar tirar, pero´l corzu ya va mata abaxo colos perros a 2 o 3 metros per detrás, corro a intentar cortar algún perro pero ye imposible, Fran piensa lo mismo y tírase tamién hacia abaxo a ver si ve salir el corzu per un prau e intentar cortar algún perro, pero nun se pue, así que tornamos al puestu... nun acabo de colocame cuando escucho otro fogonazu arriba, Lupión coménta pol walki que disparó sin confirmar la muerte, viendo al corzu seguir mata abaxo; mientres habla oyense disparos na mesma zona, esta vez de Luis "Muñera" que está nun puestu per baxo Lupión, siente´l Corzu baxar pela pista y abre fueu, confirmando rápidamente la muerte; había rematado´l corzu de Lupión (o eso creimos todos, Lupión y Muñera incluios). Nun yeren les 11:00 la mañana.
Descargamos les armes y vamos subiendo hacia el punto de reunión para ver la pieza. Vamos animaos por la echá tan guapa y rápida que habiémos tenio, yo voy con Fran y Pedro comentando´l corzu que nos había pasado y según vamos llegando, ya de primeres extráñanos la cara de la xente, más que de alegría, de incredulidad y disgusto, miro al suelu y nun puedo evitar poner la misma cara... AQUELLO YERA INCREIBLE!!!, el corzu abatiu por Luis nun yera´l de Lupión que taba muertu na mata, yera otru, así que de nuevo repetíemos fallu y matábemos una pieza de más. Esta vez yeren 300€ y de nuevo decomisación de la pieza, pa la próxima quiten-nos cacería. Nun se pue decir que tuviéremos contentinos, sobre todo Pepe el guarda que de dos caceries, en les dos la armamos, aunque ye obvio que en nengún casu hubo intención de ello, yera imposible evitar que dos puestos seguidos con les pieces entrando al mesmu tiempu estremaren si tirar o non, o si yera la mesma pieza o non. El tema afectonos a todos y falose incluso de nun cazar el xabalí, si bien una vez consultao cola directiva nos confirmaben que yeren permisos estremaos y que debíemos continuar la batida. Ye verdad que hay coses peores poles que preocupase o tar consternaos, naide salió heriu, nun hubo nengún accidente... pero nun dexa de afectanos a todos lo acontecio, nun ye platu de buen gustu matar más de la cuenta y menos aún en dos ocasiones seguies, aunque sea sin intención d´ello. Al menos nesta cuadrilla (como en la mayoría) cazamos pa disfrutar del monte, del trabayu de los monteros y los perros y por supuesto de los compañeros de cuadrilla, esquilmar el monte nun entra dentro de los nuestros valores.

Una vez calmaos pela desafortunada echada, dispusímonos a echar el xabalín na mesma zona, nos Troncos, algo más adentraos na mata dando la espalda a Fechaladrona. Facemos dos echaes pero nun hay éxitu, nesa zona nun hay xabalín, aunque sí rastros.

Decidimos movenos y cambiar pa otru llau, polo que vamos pa los coches, reunimos los perros, comemos algo y organizámonos. Vamos a echar el monte al pie de Fechaladrona, polo que varios cazadores copen por embaxo´l pueblu y el resto atravesamos el pueblu colos todoterreno y vamos copando pela pista que sube. Tardamos un poco y cuando acabamos confirmen la presencia del gochu y suelten los perros, poco después ven el xabalí subiendo por un prau y avisen que ten preparaos los de los puestos. Guardamos silenciu y de repente la emisora alloquez ALTO!!! ACABOSE!!! DESCARGAR LES ARMES!!!, y casi mientres nos preguntamos qué pasó, BOOM!!!, lléganos el ruiu del fogonazu... ye tal la obsesión y el nerviosismu que tenemos por nun matar más del cupo, que a algunos llegonos antes la orden de alto pela emisora que´l ruiu de la detonación. Armando había disparado y abatido´l xabalí con un certeru tiru na cabeza, a la altura de la oreya derecha. La batida había acabado, así que recogemos y tiramos pa Villoria a tomar algo. Cuando por fín estamos todos son ya casi les 5 de la tarde.

Después de tomar algo repartimos les pieces, llevamos el Corzu decomisau a la directiva y vamos a tomar algo a Muñera hasta les 6, que marchamos pa casa a cambianos y aseanos pa dir a cenar a les 8:00

Menu Los Panchos:

Venado ahumado (traido por mi y Adrián de Alemania),

sopa, callos con patates frites, raxes de carne, carne empanao, postres, cafés y chupitos.

30/09/2009 Area 4. Soto. Xabalí

El pasau miércoles 30 de Setiembre, la cuadrilla 13 de Lupión teníemos el primer día col que estrenar la temporá, nel Area 4 en Soto, al xabalí.

A les 8 la mañana quedamos nes instalaciones de la Sociedá "El Raigosu", nel Mercau de Llaviana pa tomar nota´l Guarda de la nuestra documentación, yeremos 14 colo que faltaben 2.

En cuanto acabamos los trámites tiramos pa Los Panchos en Muñera pa tomar un cafetín y preparar el día, colo que pa cerca les 9:00 la mañana tábemos saliendo pa Soto.

La primer (y única) echá fué na zona llamao "Les Mines", enfrente de la fuente de les Hedraes. Una vez llegaos, tras algún despiste de caminos colos coches, empezamos a colocar los puestos pa copar. Tabemos 14 cazadores, colo que tres puestos dibemos nel alto, subiendo pol vieyu camín a les mines. Dos rifles na peña y yo con escopeta a los pies de un felechal de cara a una mata. Acompañonos pa colocar estos puestos Pepe el Guarda. El resto compañeros tiraron colos todoterreno más alantre pa copar pel cantu, al otru llau la mata y nos praos que linden cola pista. Algunos puestos nun yeren muy afayaizos de llegar, polo que tardamos como una hora y media en colocanos.

Pela emisora los monteros comunicaben rastros dende bien temprano, polo que paecía que la gochería nel monte yera buena.

Una vez colocaos tolos puestos dan avisu a los monteros pa que entren na echá. El rastru ye buenu y suelten a los perros. Ye nesi momento cuando un perru, que nun dexaremos de alabar, destaca sobremanera, el Rex de Lupión pilla rastru caliente y tirase como enlloqueciu al monte detras de los gochos, mientres que otros perros, despistaos, siguen el rastru a la contra, l´espectáculu taba serviu, los gochos nun querien salir de la mata, polo que tuvimos que ver a Rex marealos hora y media, saliendo de la echá, tornando, subiéndo, baxando a la riega, tornando a subir...Manolo Corte y algún otru ven los gochos pela mata sin poder tirayos, y nun ye hasta casi hora y media depués que los monteros avisen pol walki que los xabalinos van directos pal alto la peña, directos a nosotros en los puestos de les Mines.

Los 3 ya tábemos preparaos y en silenciu... pasen los minutos y Adrián (de los Veneros) atisba a los xabalinos pasando ente los ablanales hacia el altu, rápidamente susurra pol Walki... "Atentu Mieres, que ahí te van"... nun tuvo que decir más, al momentu comenzó´l tiroteo. 4 disparos, y Luis "Mieres" confirma un xabalí muertu, otru perdiolu de vista descolgándose pela peña abaxo y nun pue confirmalu, así que Adrián que ta atentu nel puestu d´embaxo, sin que pasaren apenas unos segundos ve baxar al xabalín y dispara, parándolu con un disparu nes pates traseres para de seguio rematar con disparu na caxa.

Acérquense a confirmar los 2 xabalinos y topen dos sorpreses, a Rex que llega cola llengua fuera pa echase a la par de un de los xabalinos, y que nun yeren 2, si non tres xabalinos muertos. Luis había acertao a dos xabalines y Adrián un llabascu. Yeren les 12:30 la mañana y habiemos acabado la batida, la mala suerte quiso que matáremos un xabalí de más, que yera confiscau pela sociedá, con una multa de 200€.

Tardamos un buen cachu en baxar los tres xabalinos ente los tres, cola suerte Adrián de topar baxando una parexa de cuernes de venao en buen estau, pa les 13:30 ya tabemos nos coches cargando los xabalinos nel remolque,

paramos a limpialos y directos pa los Panchos, onde tomamos algo antes de dir a aseanos un poco y tornar a les 3 pa comer.











Menú Los Panchos:
-Entrantes variados (fritures, chorizu, quesu, lomo, xamón...), Sopa de fideos, corderu con patates, Chuletes de gochu, Carne asao, Postres, café, chupitos y copes.